Во чест на Меѓународниот ден на шумите, заедно со директорот на Ј.У. Национален Парк „Шар Планина“, Емир Хусејн, Заменик Министерот на Министерство за Земјоделство, Шумартство и Водостопанство Флакрон Бежети, реализиравме симболична акција за пошумување на локацијата Аргач во село Ѓурѓевиште. Оваа активност го означува почетокот на проектот за пошумување на дел од Шар Планина, кој се спроведува благодарение на донација од 15.000 садници од компанијата Pure Benefit од Холандија. Оваа заложба ќе продолжи и во други подрачја кои се предвидени за пошумување во рамки на оваа долгорочна иницијатива.
Шумите покриваат околу 40% од територијата на Северна Македонија и претставуваат драгоцено природно богатство , кое игра клучна улога во зачувувањето на биодиверзитетот, климатската стабилност и квалитетот на живот во руралните и урбаните средини .
Во време кога шумите се соочуваат со големи предизвици како оштетувања, пожари и климатски промени, ваквите активности за подигнување на свеста се суштински за поттикнување на колективна одговорност и постојана посветеност кон заштита на природата.
Зелената иднина зависи од нашата грижа.
