Në nder të Ditës Ndërkombëtare të Pyjeve, së bashku me Drejtorin e I.P. Parku Kombëtar “Mali Sharr”, Emir Husejn, dhe Zavendës Ministrin e Ministrisë së Bujqësisë, Pylltarisë dhe Ujrave Flakron Bexheti realizuam një aksion simbolik të mbjelljes së drunjve në vendin Argaç në fshatin Gjurgjevishtë. Ky aktivitet shënon fillimin e projektit të ripyllëzimit të një pjese të Malit Sharr, i cili po realizohet falë një donacioni prej 15.000 fidaneve nga kompania Pure Benefit nga Holanda. Ky angazhim do të vazhdojë edhe në zona të tjera, të cilat janë paraparë për ripyllëzim në kuadër të kësaj iniciative afatgjate.
Pyjet mbulojnë rreth 40% të territorit të Maqedonisë së Veriut dhe përbëjnë një pasuri të çmuar natyrore , që luan rol kyç në ruajtjen e biodiversitetit, stabilitetit klimatik dhe cilësisë së jetës në hapësirat rurale dhe urbane .
Në një kohë kur pyjet përballen me sfida të mëdha si dëmtimi, zjarret dhe ndryshimet klimatike, veprime të tilla ndërgjegjësuese janë thelbësore për të nxitur përgjegjësi kolektive dhe përkushtim të vazhdueshëm ndaj mbrojtjes së natyrës.
E ardhmja e gjelbër varet nga kujdesi ynë.
